Lífsskrá eða lífsviljaskrá (e. advance directive eða living will) er undirritað skjal þar sem einstaklingur skráir óskir sínar um læknismeðferð og umönnun við lífslok. Hún er útbúin á meðan einstaklingurinn er fær um að taka upplýstar ákvarðanir um eigin meðferð og er ætlað að tryggja að óskir hans séu þekktar og virtar ef hann missir síðar getu til að tjá vilja sinn eða taka þátt í ákvörðunum, til dæmis vegna alvarlegra veikinda eða slyss.

Í lífsviljaskrá er einnig hægt að tilnefna umboðsmann eða talsmann sem kemur óskum einstaklingsins á framfæri og tekur þátt í umræðum um meðferð hans, ef hann er ekki lengur fær um það sjálfur.

Einstaklingur getur meðal annars tekið fram í lífsviljaskrá að hann óski ekki eftir meðferð sem hefur það að markmiði að lengja líf hans við tilteknar aðstæður. Einnig getur hann lýst þeirri ósk að slíkri meðferð verði hætt ef hún hefur þegar verið hafin. Dæmi um lífslengjandi meðferð eru öndunarvélameðferð, endurlífgun með hjartahnoði og/eða lyfjum, blóðskilun, gjörgæslumeðferð og næringargjöf með slöngu.

Afstaða Lífsvirðingar

Lífsskrá var áður í notkun hér á landi en var lögð niður árið 2015. Við hjá Lífsvirðingu teljum mikilvægt að taka hana upp að nýju og stuðla þannig að því að sjálfsákvörðunarréttur sjúklinga sé betur virtur. Lífsviljaskrá getur jafnframt komið í veg fyrir að einstaklingar hljóti meðferð sem gengur gegn vilja þeirra, gildum og lífsskoðunum.

Samhliða endurvakningu lífsviljaskrár teljum við mikilvægt að efla fræðslu og þjálfun heilbrigðisstarfsfólks um ákvarðanir við lífslok og hvetja til opinnar og víðtækrar samfélagsumræðu um þessi málefni.

Ein leið til að auka aðgengi að lífsviljaskrá væri að gera hana rafræna, til dæmis í gegnum Heilsuveru, og tengja hana við sjúkraskrárkerfið Sögu. Þannig væri hægt að auðvelda heilbrigðisstarfsfólki aðgang að skráðum óskum sjúklinga þegar ákvarðanir um meðferð þeirra eru teknar.

Framtíðarsýn Lífsvirðingar er jafnframt sú að einstaklingar geti, að uppfylltum skýrum lagalegum skilyrðum, skráð óskir sínar um dánaraðstoð við tilteknar og vel skilgreindar aðstæður, ef og þegar löggjöf um dánaraðstoð hefur tekið gildi hér á landi.